دوبيت من بلدنا
بعض ابيات الدوبيت
شايف فيك عمايل والدك الكاّت عندو
ستار للعروض ديمة القرش بتفندو
الحصحاصة في المثل الضرس بتسندو
والأجواد غناهو وفقرو واحد عندو
.............................
صبيا ماختر لامن شهيرو مات
وماكجر الحوايا وفى ضراهن بات
ماطلع الجبل دلى السداسيات
كيف ابكن عليهو دغس العيون ان مات
............................
أكان أداك وكتر مابقول أديت
أبدرقا موشح كلو بالسوميت
أبرسوة البكر حجر شراب سيتيت
كاتال في الخلا وعقبان كريم في البيت
...................
نحن ولاد بلد اهل الكرم لا حدو
نحن اللي الضعيف باب العوج بنسدو
نحن الفي الحروب فرسانا ما بنعدو
سرج الخيل علي ضهر المحن بنشدو
.....................
دقيـت اليميـن انـو القمـر إتدلى
في نص النهار سارح يحوم في الحله
غيمت السما وشـرقت نجـوم تتجلى
وانبهرت عيون عاجـباها خـلقة الله
سبحان الخلق سواها واحده فريدا
وخلى الليل يجي وينزل ينوم فوق إيدا
والنجم انتظم عقداً جميل فوق جيدا
زي طفلاً وديع من نظرة بس بتريدا
في الذوق والجمال ما شفت اصلي نديدا
أزمعتي الرحيل قصدك تزيدي جروحي
يا ام خشماً تقيل بى حبي مابيا تبوحي
حبك في الفؤاد دايماً مشحتف روحي
وين القى الرقاد كان ناوية انتي تروحي
مطر الريد رشع وأنا وإنتي إترشينا
وإتشابينا فوق ضهر السحاب ومشينا
وشك قوس قزح يا السمحة يوم تغشينا
سارحين في الخصل وجوا العيون طشينا
عنقك جيدو فاسح من اكتافو مو متقارب
ونورك شع في ضى الرتاين ضارب
جسمك لجة تطبع منو كل مآرب
ويطفى زعايم الحر والحميم الصالب
بقلم علاء الدين كمال بدوى
سودانى الجنسيه اعمل فى مجال الطباعة و احترف الانترنت و البرامج التصميميه شعارى ..نودع الماضى و نعيش الحاضر و نرحب بالمستقبل
ليست هناك تعليقات
إرسال تعليق