للشاعر ابراهيم الراوى
يتحدث عن ثمانيه نساء من الحلة و جلساتهم يقول :-
ان جــات نمرة واحد شـايلة تروبه
اتحصـن و اقيف انضارا فى طوبه
نمرة اتنين تكـون الجبنة مكبوبه
احلف باليمين قول ليها مشروبه
نمرة تلاتة جات مفتاحا فى اباطة
دخلـت بالفريق صواطة خلباطة
صبرنالك كتـير قايـلـين بتنـاطة
مالو كل صبحا جديد الكوم يزيد واطه
نمرة اربعة جات متـلفى فى توبه
تتلفت تقول فى الواقعى مضروبه
ان صدناها بالدعوة البخافوبة
بى نار ود خميس و معاها راكوبة
جاتكم نمرة خـمسة طابقة مركوبة
تمرق من طلوع الشمس لى غروبة
فى التموين كتيركم انتى مكتوبة
دى الفى نص دقيقة تلخبط الحوبة
ان جاتكم نمرة ستة شوية مسكينة
تجالس مرة مرة تشوف امور دينه
نستغفر نقول يا ربى تهدينا
و على درب المدينة يصيح منادينا
ان جاتكم نمرة سبعة اخلاقا ملعونه
قايمى من الفجرو التفتى فى عيونه
مصرصرى فى دلوقا و كافى ماعونه
تقيف تقطع تقول لا يبقى سمعونا
نمرة تمانية كان الله فى عونا
تلملم فى الحدج قايلاه قاعونه
السنى كدبت يا ناس افزعونا
دى عندها كار قبيل من ناس اشبعونا
اتلاقن جميع و اتلملمن جوه
و لفن الكلام لا حولا و لا قوه
قعدن لى فلان سوه و فلان سوه
اريتكن بى حريق ناس فاطنى بت ضوه
من ساقة الحسين قبال على سابه
امرق الحاجة زينب و ساقة النسابه
قول للباقى الما تمسك ادابه
بقبل فوقا فيها العرفه بتغابا
و الله العظيم كان اتقرن فيكن
و تاالله القديم لو اتقرن فيكن
افشاكن قبل و امرق اساميكن
احضر لى كتافا بيهو ارميكن
و ادفن لى قنابلا تتفجر فيكن
الشاعر خليفه الماحى مبارك
سرقت عصاه فى مناسبه فرح فجارى الشيخ الماحى فى قصيدته الشهيره
شى لله بيكم يا اسيادى
يا اهل القبه تتموا مرادى
بسم الله اول يا بادى
يا الله لى فضلك راجى
عصاتى الراحت بى غادى
انشالله الشالا ما يلقى شهادى
جيت وقيع يا الشيخ الهادى
يا العجمى القبل البولادى
عصاتى الشالة تخلى يضاضى
كان بى دابى تصبحو قاضى
جيت وقيعكم يا شمابى
اخد مشوار رايح الحامدابى
لى وراق بكتب جوابى
انشالله الشالا يشيلو الدابى
الشيخ الماحى بهز راياتو
الراجل البركه يقوم ببواتو
دحين حواركم شالوا عصاتو
الشالا يشيلوا الدابى من اباطو
و ينكم لى و ينكم يا اهل الله
جيت وقيع يا الحاج عبد الله
عصاتى الشالا تصيدو الشله
صايحو يقول راح فى حق الله
جيت وقيعك يا ود شمه
تشوفلى عصاتى الراحت ضمه
انشالله الشالا تصيدو الحمه
تعجل قتلو عديم الزمه
جيت لى بابكر الصديقى
تشوفلى عصاتى بى اى طريقى
عصاتى انسرقت منى سريقى
انشالله الشالا تمسكو شقيقى
وينك لى يا صهيبى
يا حاضر ماجاتك غيبى
عصاتى انسرقت فى قنيبى
الشالا يكون سراق قسيبى
يا ود زينب الفى مسيدو
ليك ناداه الراجيهو تفيدو
عصاتى الشالا تقصر ايدو
جيت وقيع صالح البركاله
بينى كرامتك ماها قواله
عصاتى انشالله الزول الشاله
تضربو سلاح لو كان غداره
يا ود ابراهيم فى اراكو
عصاتى اسمع بى مساكو
يقوم نباهو يطق كوراكو
عليك يتلموا اهللك يتباكو
عبد القادر يا الجيلانى
شيخ برغوث فى البر التانى
عصاتى السمحه انا العجبانى
الشالا عويناتو تكون تلفانى
ود مسود انا ما ناسيهو
و مو محتاج لامن اصيهو
عصاتى الشالا تبين فيهو
ايدو الشالت ما تكسيهو
يا ولاد جابر لى بى سرعه
قوموا جميع لا ترموا القرعه
ان كان فى بحر ان كان فى ترعه
ياكلو الدود ما تفضل ضلعه
الفكى شيخ يا راجل القلعه
ندهتك لى تقوم بى سرعه
عصاتى الشالا تمسكو الصرعه
يصيح اليوم فى ديارن برعى
رقيق نورى انا جيت حابيلو
ابو الكارورى انا جيت شاكيلو
تقولى الشالا انا يانى قبيلو
زى ما شالا الدابى يشيلو
يا ود حاج الجابو كساكا
جيت وقيع انا بترجاكا
عصاتى الشالا تقابلو براكا
عليهو تخلى الناس تتباكا
جملة الاوليا يا الكباشى
ود عدلان الفى تنقاسى
جيب لى عصاتى عليك مو قاسى
انشالله الشالا يشيلو الراسى
ختمت مدحتى على الركابه
رواها خليفة مدحتو الجابه
دحين الشالا اليتوضابه
رجيت الله تاخدو الوتابه
منقول من صور و حكايات
لعبد الرحمن بلاص
بقلم علاء الدين كمال بدوى
سودانى الجنسيه اعمل فى مجال الطباعة و احترف الانترنت و البرامج التصميميه شعارى ..نودع الماضى و نعيش الحاضر و نرحب بالمستقبل
ليست هناك تعليقات
إرسال تعليق