من الدوبيت

نحن جدودنا اظهر من علم بينين 
نحن قلوبنا من فولاذ حديد ما بلين 
نحن العن عروضنا لؤام وجبارين 
بعرفنا الصبر يا الملكه صبارين 
*******
نحن أهل كُتال كل الدول عارفانا 
ما بنهاب من الموت ولا الجبخانه
عدونا نضربه لا من ينقلب عُطرانه*
والضاق إيدنا كان دخل القبر بطرانه 
**********
نحن المابنكن الزاد ونتحشربو 
ونحن المابندى عطانا نتفرشبو*
يوم الموت نريده ونتباشربو
نحن هنية الولد البنتعاشربو

############

أنا البحر الكبير الدابو حمّر
أنا قدحة زناد مُدفع معمّر
بشد البانقير جملي المضمّر
وأنا كردفاني اخو أم عفشا مجمّر
*******
أنا البحر الكبير إن عبر ونى 
وأنا رحل الكحل إن ميلونى 
أنا شوك الكتر إن جرجرونى 
وأنا الجن البخلى الزول ينونى 
********
أنا البحر الكبير جاب الكُليته
وأنا رحل الكحل متموم شطيطه
أنا الجن الوقع في زولُه عيطه
وأنا كردفاني اخو المحزوم رحيطه

###########

عفيت منك ياتور الخلا الجاموس 
ماللفارغه جوه الفريق ليها بكوس
ماك الهوين ماك الصبى المكنوس
راجل الحاره الليها ديمه يكوس


أنا التوب العشارى الـباهـى زيقو 
وانا الدابـى إن كمـن لـلزول يـعـيـقـو
وانا فـراج الــرجال وكـتــين يـضــيقو
وانا الـمأمون على نـسوان فريقو

#############

غنى وشكري يالصفره مستوره
فوق تلب الخلا الغابتو محجوره
يامرض القلب وما بتخاف روبه
نوسار للخصيم لمن يموت طوله

############

غنى وشكرنو يالتلات أخوات 
لا رجفت لحمتو ولا لسانو اللات
السيف في يمينو بقدل على الدرقات 
الخزين أخوي ومقنع الكاشفات

##############

بقلم علاء الدين كمال بدوى

سودانى الجنسيه اعمل فى مجال الطباعة و احترف الانترنت و البرامج التصميميه شعارى ..نودع الماضى و نعيش الحاضر و نرحب بالمستقبل